بالصور / فتاة تونسية تستغيث :" الدولة فكتلي ولدي وحاطينو للتبني..." !

نشرت فتاة تونسية نداء استغاثة بتدوينة على 
Groupe "Lost and found" 
لإسترجاع ابنها بعد افتكاكه من السلطات وقد تفاعل معها عديد رواد الفايسبوك وهذا ما جاء في نصّ التدوينة  :
صبرت برشا و توا لازمني نحكي..قولو عليا الي تحبو..أنا الطفله الي غلطت صغيره و جابت طفل من غير زداق بوه حرق وخلاني..أما طلعت مرا و ماطيشتش ولدي فالپوبال كيما عملو برشا و لا خليتو فالسبيطار وروحت أنا حطيت مستقبلي و صغري في كفه و ولدي في كفه و اخترتو هو خاطر ماعندي حد ولدي هو امي و بابا و كل شي ف حياتي .. خدمت عند العباد فالديار و أنا حبله فالسابع بش نجم نجيب لولدي كسوتو و كوشو قبل مايتولد اقسم بالله خدمت نظف فالديار وأنا كرشي قدامي و ولدتو و بعد 4 شهور جات الدوله هزتو مني خاطر ماعنديش دار و خدمه قاره يحبو مني كونترا دار و خدمه الي كان لازم هوما اول حاجه تعاوني بش ناقف على ساقيا و وقت الي يلقاوني مانيش capable يعاودو يفكوه مش يخلوني لا منجمعه نتعود بلاش ولدي لا منجمه نركز في حياتي بش نرجعو... كيفاه بش نلقى خدمه قاره في بلادي مش بلادي و وحدي و عندي كان نيفو الباك و ماحب حد يخدمني بكونترا ولا يكريلي بكونترا خاطر خائفين مالظرائب...قعدت شهور نهز ساق تغرق لخرا مالقيتش حل لين هبط قرار ايداع نهائي لولدي مالمهديه لتونس..والقاضي قالي ولدك انساه اعتبروه ولد الدوله و طفل مهدد توا ولدي حاطينو للتبني ولا  تبنوه راني ماعاش نعرف حتى شي ماعندي الحق نعرف عليه حتى شي نجم كان نمشي للبلديه نشوف ولدي اسمو موجود ولا...انا اقسم بالطبع لا صححت على حتى ورقه لا تبني لاكفاله حسو بيا والله لا عاد نجم خايفه نضعف اكثر و نقتل روحي عايشه على أمل 1% انو جود يرجعلي ..نعرف الي أنا غلطت و برشا و غلطه بش تبعني عمري الكل  كيما نعرف زادا الي ولدي بدلني و ماعاش حاجتي بحتى شي مادنيا كان جود..الناس الي بش تسبني كل وحده نقلها حط روحك في بلاصتي و أي طفله ينجم يصير فيها لي صار فيا مافما حد معصوم ربي يعرف الي أنا بعت الدنيا و شريت ولدي و تعبت عليه و ضحيت على خاطرو بش يسامحني.. أنا توا في تونس وين ولدي وين أنا جيت و بت للشارع من حي الزهور لبرشلونه نبات مصبحه فالقهاوي و تحت المنڤاله خايفه مالنطاره بش نوصل لأي خيط ولا اي قناة نحكي نحب نرجع ولدي
 نطلب من اي حد ينجم يعاوني نوصل صوتي ولا يعرف جمعيه مايبخلش عليا براس ميمتكم لا تبخلوني والله لاعاد نجم