إحذروا / زريقة ” الكوكتال” أو ” زريقة الڤريب ”.. كلها أسماء لشيء واحد هو الموت البطيء !

زريقة” الكوكتال” أو ” زريقة البرودة ” أو زريقة ” الڤريب “
كلها أسماء لشيء واحد ألا وهو زريقة #الموت_البطيء
برشا نسمعوا بالزريقة “الكوكتال”, و ماشي في بالنا حاجة باهية للڤريب ، أما الحقيقة المرّة إنو هالزريقة هي أتعس ما تم إختراعو و المخترع الأول متاع هالخلطة السحرية مجهول و الأكيد إنو لا يمكن أن يكون من الوسط الطبي..
و بحكم إنّا على أبواب الشتاء، تبدا تكثر حالات الڤريب عند الصغار و الكبار خليني نحكوا على خطورتها على المريض على المدى القصير و البعيد..
الزريقة هاذي خليط متكون من حاجتين: من محلول الكورتيزون (corticoïde) المعروفة عند الناس الكل ب Unidex و من محلول Aspegic :
 محلول الكورتيزون أو “Unidex” في الأصل هو مضاد للالتهابات و الحساسية، صحيح انها تنقص أعراض الرشح و هذا الجانب الظاهر متاعها، أما الحقيقة المظلمة إنو تكرارها و استعمالها في غير موضعها يضعف الجهاز المناعي بصيفة كبيرة و خطيرة. المناعة إلي هي العمود الفقري لمقاومة حالات الڨريب و بقية الأمراض الفيروسية الأخرى.
لازم الناس الكل تعرف إنو حالات الرشح هي وسيلة دفاع طبيعية من الجسم في المعركة متاعو ضد الفيروس و الزريقة هاذي تنقص من وسائل الدفاع الفيزيولوجية ( و يظهر و كأنّي نقصت في أعراض المرض) و بالطريقة هاذي ينجم ڤريب عادي إلي هو مرض فيروسي يتحول لإلتهاب رئوي أو إلى مرض جرثومي أخطر بمعنى آخر من كان الجسم يحارب في فيروس يولي يحارب في جرثومة.
و أخطر من هذا إنو الزريقة هاذي و التكرار منها تسبب:
-ارتفاع ضغط الدم Hypertension artérielle.
-فشل القلب insuffisance cardiaque.
-هشاشة العظام ostéoporose.
-اضطرابات في الغدد و الهرمونات.
-اضطراب في النمو عند الأطفال و المراهقين.
-الشهيقة Hoquet
-قرح المعدة و الأمعاء Ulcère.
-مرض السكري Diabète.
و القائمة تطول….
 المكون الثاني Aspegic، إلي هو في الأصل مضاد للألام و مضاد للحرارة.
و إذا باش نكتب الأثار الجانبية متاعو و خطورة متاعو مانيش باش نرڨد الليلة أما شد عندكم إنو هالزريقة تسبب:
-التهابات الكبد Hépatite.
-التهابات البنكرياس Pancréatite.
-الفشل الكلوي insuffisance rénale…..و القائمة تطول..
 خلاصة القول :
أسمع كلامي ماعادش تزرقها هالزريقة. داوي روحك على قاعدة و خلي جسمك يقاوم المرض.
الصيدلي و الطبيب يعطوك النصيحة الصحيحة و الدواء المناسب.
و ما تستعجلش على الشفاء الدواء لازمو شوية وقت باش يعطي مفعولو..
منقول